到底乜嘢係蹼泳？ 原來蹼泳同游水一樣都有四式？即刻碌落去了解蹼泳嘅基本知識啦！

蹼泳起源？

喺上世紀三十年代，一位法國嘅海軍軍官為咗令海軍喺水入面游得更快，協助搜救戰爭上面嘅傷兵，所以發明咗橡膠腳蹼，自此就出現咗蹼泳運動！一開始蹼泳係雙蹼為主，因為速度快，可以令運動員感受到極速嘅快感，因此喺歐洲愈嚟愈流行，甚至前蘇聯、意大利及瑞士等地都有舉辦蹼泳比賽！直到至1972年，出現單片式腳蹼，即單蹼，泳手把雙腳的腳蹼併在一起，泳姿如海豚般擺動，將蹼泳帶到一個新嘅境界。

參考資料來源：youth.gov.hk

咩係蹼泳？

蹼泳係一種新興運動，主要利用腰腹擺動前進，而且腳要著上蛙鞋，有時都會配合其他器材（如呼吸管），而泳姿就像海豚一樣。

蹼泳同游水一樣都有四式，分別係：水面單蹼、屏氣潛泳、器泳以及雙蹼。而針對小朋友未完全發展好嘅身體，所以小朋友可以玩短雙蹼，喺感受比平時快嘅水感之餘對身體嘅負擔都唔會好大。

水面單蹼

水面單蹼係喺水面用豚泳嘅姿勢，配合單蹼，利用佢巨大嘅面積，加埋呼吸管，令到每一下踢水都更快！

使用器具	單蹼、泳鏡/面罩、泳帽
難易度	中等
速度	極快

屏氣潛泳

屏氣潛泳簡介

屏氣潛泳同水面單蹼都好似，不過成個動作就係喺潛喺水入面閉氣五十米咁游，由於可以有更大嘅踢水幅度，所以比起水面單蹼更快！

使用器具	單蹼、泳鏡/面罩、泳帽
難易度	中等
速度	極快

器泳

器泳同水面單蹼都好似，不過佢會用埋空氣樽，容許蹼泳運動員喺水入面游較屏氣潛泳更長嘅距離，同屏氣潛泳一樣，由於可以有更大嘅踢水幅度，所以比起水面單蹼更快！

使用器具	單蹼、空氣樽、泳鏡/面罩、泳帽
難易度	較難
速度	極快

雙蹼

雙蹼係蹼泳嘅入門基本泳式，同單蹼唔同，每一隻腳都會有獨立嘅蛙鞋著住，就好似著住蛙鞋游自由式咗，所以著住佢游，每一下踢水嘅力量更大之餘，當然都會比自由式游得更加快啦！

使用器具	雙蹼（蛙鞋）、呼吸管、泳鏡/面罩、泳帽
難易度	入門
速度	快

短雙蹼

短雙蹼係雙蹼嘅分支，最主要係比初初接觸蹼泳嘅人可以更輕鬆咁感受蹼泳呢一項運動，而現代嘅游泳訓練好多時都會用短雙蹼嚟練下肢嘅力量，所以學短雙蹼嘅時候同時亦都可以令學員游水游得更加好㗎！

使用器具	短雙蹼（蛙鞋）、呼吸管、泳鏡/面罩、泳帽
難易度	入門
速度	中等